ဒီတစ်ခါမှာတော့ အရောင်းမန်နေဂျာတွေ၊ အရောင်းပိုင်းကိုစီမံ ခန့်ခွဲနေတဲ့ လုပ်ငန်းရှင်တွေ အနေနဲ့ မိမိ လုပ်ငန်းအတွက် အရောင်းပိုင်း ဗျူဟာတွေကို စနစ်တကျ မှန်မှန် ကန်ကန် ချမှတ်နိုင်စေဖို့ သိထားသင့်တဲ့ Sales Planning Process အကြောင်းကို မျှဝေ ပေးချင်ပါတယ်။

သင့်လုပ်ငန်းရဲ့လက်ရှိအနေအထား၊ ဈေးကွက် အခြေအနေ၊ လိုချင်တဲ့ရလဒ် တွေကို မသုံးသပ်ပဲ စိတ်ကူးပေါက်သလို လိုက်လုပ်နေမိတာထက်စာရင် ဒီလိုမျိုးစနစ်ကျတဲ့ အဆင့်တွေကိုသိထားမယ်၊ အစီအစဉ်တွေ ဆွဲတတ်မယ်၊ လက်တွေ့ အကောင်အထည်ဖော်မယ် ဆိုရင် သင့်လုပ်ငန်းမှာ ရောင်းအားတွေ တက်လာဖို့ အထောက်အကူဖြစ်တာပေါ့။ 

၁) ရှင်းရှင်းပြတ်သားသော ရည်မှန်းချက် ချမှတ်ခြင်း

အရောင်းပိုင်းကို စီမံခန့်ခွဲနေရသူတွေ အနေနဲ့ပထမဆုံး ရှင်းလင်းပြတ်သားသင့်တာက လိုချင်တဲ့ရလဒ်၊ ရည်မှန်းချက် ဖြစ်ပါတယ်။ ဖြစ်ချင်တဲ့၊ လိုချင်တဲ့ ရည်ရွယ်ချက် ကိုရှင်းရှင်းလင်းလင်းသိနေမှ အဲ့ဒီ ရည်မှန်းချက်ကို ရဖို့ ဘယ်လို လုပ်ရမလဲဆိုတာကို စဉ်းစားနိုင်မှာပါ။ 

ဥပမာ – သင့်လုပ်ငန်းမှာ ဒီနှစ်မှာတော့ ဒေါ်လာ ၁ သိန်းဖိုးရောင်းရတယ်။ နောက်နှစ်မှာ ၂၀ % တက်အောင် လုပ်မယ်ဆိုတော့ ဒေါ်လာ ၁ သိန်းနှစ်သောင်းဖိုးရအောင်ရောင်းမယ် ဆိုတာမျိုးပေါ့။ 

၂) လိုချင်တဲ့ရည်မှန်းချက်ကို ရဖို့ လုပ်ဆောင်သင့်တဲ့အချက်များ ကိုကြိုတင်စဉ်းစားရခြင်း

ရည်မှန်းချက်ချပြီးပြီ ဆိုတာနဲ့အဲ့ဒီ ရည်မှန်းချက်ကို ရဖို့လုပ်ဆောင်သင့်တဲ့အချက်တွေကို တစ်ချက်ချင်း စဉ်းစားရမှာဖြစ်ပါတယ်။ 

ဥပမာ – နောက်နှစ်မှာ ရောင်းအား ၂၀ % တိုးပြီး ဒေါ်လာ ၁ သိန်းနှစ်သောင်းဖိုးရောင်းမယ်။ ဒါဆိုရင် ရောင်းရအောင် ဘယ်လိုလုပ်ကြမလဲ။ လက်ရှိအရောင်းသမား အရေအတွက် နဲ့ဖြစ်နိုင်လား၊ လူထပ်ခန့်ရမှာလား၊ အရောင်းတက်လာရင်ရော ထုတ်လုပ်မှု အပိုင်းက လိုသလောက်ကို၊ လိုချင်တဲ့အချိန်မှာ ထုတ်နိုင်မလား၊ ထုတ်နိုင်အောင် ရောဘယ်လို လုပ်ရမလဲ စသည်ဖြင့် သင်လိုချင်တဲ့ရည်မှန်းချက်ရောက်အောင် လုပ်ဆောင်ရမယ့်အဆင့်ဆင့်ကို ကြိုတင်ပြင်ဆင် စဉ်းစားဖို့လိုပါတယ်။ 

၃) လက်တွေ့ ဆောင်ရွက်နိုင်ဖို့ စီစဉ်ရခြင်း

ရှေ့က အဆင့်တွေမှာ အစီအစဉ်တွေဆွဲပြီးပြီ ဆိုရင်တော့ အမှန် တကယ်လက်တွေ့ လုပ်ဆောင် နိုင်ဖို့အတွက် department တစ်ခု ချင်းစီ နဲ့ သင့်ရဲ့ အရောင်းသမားတစ်ယောက်ချင်းစီ ကို တာဝန်တွေ ခွဲဝေပေးဖို့လုပ်ရပါတယ်။ 

ဥပမာ- နောက်နှစ်မှာ ဒေါ်လာ ၁ သိန်းနှစ်သောင်းဖိုးရောင်း နိုင်ဖို့ အတွက် အရောင်းသမား တစ်ယောက်ချင်းစီ ကသူတို့ ရာထူးတာဝန် အလိုက် တစ်ယောက်ကို တစ်နှစ်မှာ ဘယ်လောက်ဖိုး ရောင်းရမလဲ။ တစ်လမှာဆို ဘယ်လောက်ဖိုးရောင်းရမလဲ။

ထုတ်လုပ်မှုအပိုင်းကရော တစ်လမှာ အရည်အသေးပြည့်မှီတဲ့ ထုတ်ကုန်ဘယ်လောက် ထုတ်ရမလဲ။ စသည်ဖြင့် လက်တွေ့လုပ်ဆောင်နိုင်ဖို့ စီစဉ်ပေးဖို့လိုပါတယ်။ 

၄) အမှန်တကယ် လက်တွေ့လုပ်ဆောင်ရခြင်း

အားလုံး အစီအစဉ်ချ ပြီးပြီ ဆိုရင်တော့ ဒီအဆင့်မှာ လက်တွေ့လုပ်ဆောင် ဖို့လိုပါပြီ။ 

သင့်အရောင်းသမားတွေ အနေနဲ့ တကယ် ဝယ်သူတွေနဲ့ ပြောဆိုဆက်ဆံပြီး တကယ်ရောင်းနေကြရပြီဆိုတော့ ဘယ်လို အခက်အခဲတွေ ရှိနေလဲ၊ သူတို့ရဲ့ ရောင်းအားတွေ တက်လာဖို့ ဘယ်လို ပံပိုးမှုတွေ၊ ဘယ်လို အကြံဉာဏ်တွေ ပေးသင့်လဲဆိုတာကို စီမံခန့်ခွဲ သူတစ်ယောက် အနေနဲ့ လည်း ဒီအဆင့်မှာ အကဲဖြတ်ဖို့ လိုပါတယ်။ 

၅) ရလဒ်ကို တိုင်းတာခြင်း

ကျွန်တော်တို့က ရည်မှန်းချက်တွေ ချထားတယ်၊ တကယ်လည်း အလုပ်လုပ်နေကြတယ် ဆိုတဲ့ အဆင့်မှာ ရပ်ထားလို့မရပါဘူး။ တစ်ခါ တစ်လေကြတော့ အစီအစဉ် လုပ်လိုက်ပေမယ့် စီစဉ်ထားတဲ့အတိုင်း ဖြစ်မလာတာမျိုးတွေ ဖြစ်တတ်ပါတယ်။ ဒီတော့ ရတဲ့ရလဒ်တွေက ရော ချမှတ်ထားတဲ့ရည်မှန်းချက်ကို ပြည့်မှီရဲ့လား၊ ဘယ်လောက် ရာခိုင်းနှုန်းအထိ ပြည့်မှီလဲဆိုတာကို တိုင်းတာ သုံးသပ်ဖို့လိုပါတယ်။ 

ဥပမာ – သင့်လုပ်ငန်းအတွက် တစ်နှစ်မှာ ဒေါ်လာ ၁ သိန်းနှစ်သောင်းဖိုး ရောင်းဖို့ စီစဉ်ထားတယ်။ ဒါဆို ခြောက်လမှာ ဒေါ်လာ ၆ သောင်းဖိုး ရောင်းရမှ ဖြစ်မယ်။ ဒါဆိုခြောက်လ ပြည့်တဲ့အခါ တကယ်ပဲ ၆ သောင်းဖိုးရောင်းနေရပြီလား ပြန်လည်တိုင်းတာ သုံးသပ်ဖို့ လိုပါတယ်။ 

၆) ရလဒ်ကို ပြန်လည်ဆန်းစစ်ခြင်း

နောက်ဆုံး အဆင့်အနေနဲ့ကတော့ ရလာတဲ့ရလဒ်တွေ၊ ပေါ်မူတည် ပြီး ဘာကြောင့် ဒီရလဒ်မျိုး ရလာသလဲဆိုတာကို စဉ်းစားဖို့လိုပါတယ်။ရည်မှန်းချက်ပြည့်မှီတယ်ဆိုလည်း ဘာကြောင့် ပြည့်မှီတာလဲ။ ဒါကိုထိန်းသိမ်းပြီး  နောက်နှစ် ပိုကောင်းအောင် ဘယ်လိုလုပ်ကြမလဲ။ ရည်မှန်းချက် မပြည့်မှီရင်လည်း ဘာကြောင့်လဲ ဘယ်လိုအခက်အခဲတွေ ရှိနေလဲဆိုတာကို ပြန်လည် ဆန်းစစ်ဖို့လိုပါတယ်။ 

ဥပမာ – ဒေါ်လာ ၁ သိန်းနှစ်သောင်းဖိုးရောင်းဖို့ စီစဉ်ထားတယ်။ ဒေါ်လာ ၉ သောင်းဖိုးပဲ ရောင်းနိုင်တယ်။ ဒါဆို ချမှတ်ထားတဲ့ ရည်မှန်းချက်ကို ၇၅ ရာခိုင်နှုန်းပဲ ထိတယ်။ ဒါဆို အရောင်းအဖွဲ့ အနေနဲ့ ဘာလို့ မရောင်းနိုင်ရတာလဲ စဉ်းစားဖို့ လိုပါတယ်။ အရောင်းအဖွဲ့အတွက် ဘယ်လို လုပ်အပ်ချက်မျိုးတွေ ရှိနေလဲ၊ အရောင်းသမားတွေ ရဲ့အရောင်းစွမ်းရည်လိုနေတာလား၊ trainig ပေးရမှာလား၊ နည်းပညာပိုင်းအားနည်းနေတာလည်း၊ သင့်ရုံးရဲ့ ဘယ်စနစ် ကနှောက်နှေးကြန့်ကြာ မှုတွေ ဖြစ်နေစေတာလဲ။ စသည်ဖြင့်ပြန်လည် ဆန်းစစ်ဖို့လိုပါတယ်။ 

ဒီလိုမျိုး အဆင့်ဆင့် လုပ်ဆောင် သွားရတဲ့ လုပ်ငန်းစဉ်ကို ကျွန်တော်တို့က Sales planning process လို့ခေါ်တာဖြစ်ပါတယ်။ 

ဒီလိုမျိုး စနစ်တကျနဲ့ ရည်မှန်းချက်ထား လုပ်ဆောင်တာတွေ၊ တိုင်းတာ တာတွေ၊ ပြန်လည် အကဲဖြတ်တာတွေ ရှိမှသာ ရေရှည်မှာ အောင် မြင်တဲ့ လုပ်ငန်းတစ်ခု ဖြစ်လာမှာပါ။

#BetterVersion #MakeYourProgress #SalesStrategy