သင့်အနေနဲ့ ကုန်ပစ္စည်းကိုပဲရောင်းရောင်း၊ ဝန်ဆောင်မှုကိုပဲ ရောင်းရောင်း ဝယ်သူဆီက discount တောင်းခံရတဲ့ အခြေအနေ တစ်ခုကို မလွဲမသွေ​ ကြုံလာရမှာပါ။ 

တချို့ လုပ်ငန်းတွေမှာတော့ ရာသီအလိုက် discount ချပေးထားတဲ့အနေအထားမျိုးတွေ, ဥပမာ new year sales, သီတင်းကျွတ် အထူးပရိုမိုးရှင်း တစ်ခုဝယ်တစ်ခု လက်ဆောင်, ဆိုတာတွေ ရှိတတ်ပေမယ့် တချို့လုပ်ငန်းတွေမှာတော့ အရောင်းသမားတွေ အရောင်းပိတ်ဖို့ အဆင်ပြေအောင် ဝယ်သူကို discount ပေးလို့ရတဲ့ ပမာဏ တစ်ခု သတ်မှတ်ပေးထားတာ မျိုးတွေလည်းရှိတတ်ပါတယ်။ တချို့ လုပ်ငန်းတွေကြတော့လည်း ပုံသေသတ်မှတ်ချက် ဖြစ်လို့ လုံးဝ ဈေးလျော့ပေးခွင့်မရှိတာမျိုးလည်း ရှိပါတယ်။ 

ဒီတော့ ဘယ််လို လုပ်ငန်းမှာပဲ ဖြစ်ဖြစ်အရောင်းသမား တွေ အနေနဲ့ကတော့ ဝယ်သူဆီက ” ဈေးလျော့ပေးပါဦး၊ discount ရနိုင်မလား” ဆိုတဲ့ တောင်းဆိုမှုက မလွဲမသွေ ကြုံရမှာပါ။ ဒီအခြေအနေကို ကောင်းကောင်း ကျော်လွှားပြီး အရောင်းပိတ်နိုင်ဖို့ ဘယ်လို လုပ်လို့ရမလဲ ဆိုတဲ့ နည်းလမ်းတွေကို လေ့လာကြည့်ရအောင်။ 

၁) သင့်ကုန်ပစ္စည်းက အခြားပြိုင်ဘက်တွေထက် ဘယ်အချက်တွေ အားသာပါတယ်ဆိုတာကို မြင်အောင် ပြောပါ။ 

တစ်ခါ တစ်လေမှာ ဝယ်သူတွေက ဈေးလျှော့ပေးပါဦးလို့ ပြောရခြင်းသည် သူတို့ အခြားမှာ ဝယ်ရင် သင်ပေးတဲ့ အနေအထားထက် ပိုရမှာပဲ လို့တွေးထားလို့ဖြစ်ပါတယ်။ “ဈေးလျော့ပေးပါဦး၊ ဟိုဘက်ဆိုင်မှာ ဝယ်ရင် ဘယ်လောက်ပဲ ပေးရမှာ” ဆိုတာမျိုး ပြောလာပြီဆိုရင် ဒါဟာ သင့်ကုန်ပစ္စည်းရဲ့ ပြိုင်ဘက်နဲ့ မတူတဲ့ အားသာချက်ကို မြင်အောင် ပြောဖို့ အခွင့်အရေးပါပဲ။ သင်က ပြိုင်ဘက်ထက် ဈေးပိုများပေမယ့် အပိုထပ်ဆောင်းရမယ့် ဝန်ဆောင်မှုတွေ ရှိတယ်ဆိုလည်း ဝယ်သူသိအောင် ပြောဖို့ လိုသလို၊  ပိုကောင်းတဲ့ အရည်အသွေး ဖြစ်နေလို့ ဈေးပိုများတယ်ဆိုလည်း ဒါကို ဝယ်သူသိအောင် ပြောဖို့လိုပါတယ်။ ဒါပေမယ့် ဒီအချက်ကို ကောင်းကောင်း ဖြေရှင်းနိုင်ဖို့က သင့်အနေနဲ့ ပြိုင်ဘက် အနေအထားနဲ့ ဈေးကွက် အနေအထားကိုတော့ သေချာ လေ့လာထားဖို့ လိုပါတယ်။

၂) သင့်ဘက်က ပေးနိုင်တဲ့အနေအထားဆို ပေးလိုက်ပါ။ ဒါပေမယ့် တစ်ခုခု ပြန်တောင်းဆိုဖို့ မမေ့ပါနဲ့။ 

အရောင်းသမားတွေအနေနဲ့ ရေရှည်မှာ အောင်မြင်ဖို့ ညှိနှိုင်းရေး စွမ်းရည်ကလည်းမဖြစ်မနေ ရှိဖို့လိုအပ်လာပါပြီ။ ဝယ်သူဘက်က ဈေးလျော့ပေးပါဦး တောင်းဆိုလာတာမှန်သမျှကို မရနိုင်ဘူး၊ အဆင်မပြေဘူးလို့အမြဲ ငြင်းနေရင် အရာင်းရဖို့၊ ရေရှည်သင့်ဆီကပဲ ဝယ်အောင် ခိုင်မာတဲ့ဆက်ဆံရေး တည်ဆောက်နိုင်ဖို့ ခက်ခဲပါလိမ့်မယ်။ ဒါပေမယ့် အမြဲတမ်းခေါင်းညိမ့်ပြီး ဈေးလျော့ပေးနေလို့ လည်းအဆင်မပြေပါဘူး။ အရောင်းသမားတွေ အနေနဲ့ လုပ်ငန်းရဲ့ အမြတ် ကိုလည်းမထိခိုက်ဘူး ဆိုရင် ကျွန်တော့် ဘက်ကတော့ ဒီနေ့ ငွေအကြေးပေးချေမယ်ဆိုရင် ဒီဈေးထားပေးပါ့မယ်ဆိုတာမျိုး။ ဥပမာ- သင်က ပစ္စည်း အရေအတွက် များများရောင်းချင်တယ်ဆိုလည်း ၁၀ ခုဝယ်မယ်ဆိုရင် ဈေးလျော့ပေးပါ့မယ် ဆိုတာမျိုး။ စသည်ဖြင့် ဈေးလျော့ပြီး အဆင်ပြေအောင် စီစဉ်ပေးပါ့မယ် အကို့အနေနဲ့တော့ ဒါလေး လုပ်ပေးပါဆိုတာမျိုးနဲ့ နှစ်ဦးနှစ်ဖက် အဆင်ပြေအောင် ညှိနှိုင်းတတ်ဖို့ လည်း လိုအပ်ပါတယ်။ 

၃) ဝယ်သူက discount  တောင်းလာတဲ့အခါ သူတို့ ဈေးနှုန်းကို ဘယ်လောက်ထိ မျှော်မှန်းထားတာ လဲအရင်မေးပါ။

သင့်ဘက်ကလည်း discount တစ်ခုခုပေးဖို့ အစီအစဉ် ရှိထားတယ်ဆိုရင် ဝယ်သူက ဈေးလျော့ပေးပါဦး ပြောလာတဲ့အခါ ဟုတ်ကဲ့ discount နဲ့ ဒီဈေးတော့ထားပေးလိုက်မယ်နော် ဆိုပြီး ချက်ချင်း ပြန်ပြောလိုက်တာသည် ဝယ်သူ့ဘက်က သင်ဟာ သက်သက် ဈေးပိုတင်ထားတာပဲ ဆိုတဲ့အတွေးမျိုးကို ဖြစ်စေတတ်ပါတယ်။ ဒီတော့ “အကို/အမ အနေနဲ့ ဘယ်ဈေးလောက် မျှော်မှန်းထားတာလဲ” ဆိုတာမျိုး မေးလိုက်ခြင်းအားဖြင့် သူတို့ တောင်းတဲ့ discount က ကျိုးကြောင်းဆီလျှော်ရင် သင့်ဘက်က ချက်ချင်း ပေးလိုက်နိုင်ပြီး အရောင်းရသွားမှာ ဖြစ်သလို၊ သင်မပေးနိုင်တဲ့ လျှော့ဈေးမျိုး တောင်းဆိုလာရင်လည်း သင့်ဆီက ဝယ်ဖို့ လုံးဝမသေချာ တော့တဲ့ ဝယ်သူ တစ်ယောက် အပေါ် အချိန်အများကြီး သုံးမယ့် အစား အခြား အလားအလာ ရှိတဲ့ ဝယ်သူကို အချိန်ပိုပေးပြီး အရောင်းရအောင် ကြိုးစားနိုင်သွားတာပေါ့။ 

၄) သင့်ဘက်က လုံးဝ discount မပေးနိုင်ရင်တော့ ဘာ့ကြောင့်လဲ ဆိုတဲ့ ခိုင်လုံတဲ့ အကြောင်းပြချက်ကို ဝယ်သူကို သိအောင် ပြောပါ။ 

သင့်လုပ်ငန်း၊ ကုမ္ပဏီ၊ သင်ရောင်းတဲ့ ကုန်ပစ္စည်းက လုံးဝ ဈေးလျော့ပေးလို့မရတဲ့ အနေအထားမျိုးဆိုရင်လည်း ဘာ့ကြောင့် ဈေးလျော့ပေးလို့မရတာလဲ ဆိုတဲ့ ခိုင်လုံတဲ့ အကြောင်းပြချက်ကို ကြိုတင် စဉ်းစားထားဖို့လိုပါတယ်။ “ဟုတ်ကဲ့ လျော့လို့မရပါဘူးနော်” လို့ တန်းပြောလိုက်တာသည် အောင်မြင်တဲ့ အရောင်းတွေကို လုံးဝ ဖြစ်စေတော့မှာ မဟုတ်ပါဘူး။ ခိုင်မာတဲ့၊ ကျိုးကြောင်း ဆီလျော်တဲ့ အကြောင်းပြချက် ဥပမာ – ကုမ္ပဏီ ပေါ်လစီအရလား၊ လျော့ဈေး ဘယ်တုံးကမှ ပေးလေ့မရှိတဲ့ အနေအထားမျိုး ဖြစ်နေလို့လား စသည်ဖြင့် ဝယ်သူနားလည် လက်ခံနိုင်တဲ့ အကြောင်းပြချက် တစ်ခုခု နဲ့ ပြန်ဖြေရှင်းပေးတာသည် သင့်ဆီက ဝယ်ဖို့ အခွင့်အရေးကို ပိုများစေပါတယ်။ 

ဒီတော့ အရောင်းသမားတွေအနေနဲ့ သင့်လုပ်ငန်း၊ သင်ရောင်းတဲ့ ကုန်ပစ္စည်း အနေအထားပေါ်မူတည်ပြီး ဒီမေးခွန်း၊ ဒီတောင်းဆိုမှုအတွက် ကြိုတင် စဉ်းစားပြင်ဆင်ဖို့လိုပါတယ်။ ဒါမှပဲ ရေရှည်မှာ အောင်မြင်တဲ့ အရောင်းတွေ ရလာမှာ ဖြစ်ပါတယ်။  

ပိုကောင်းတဲ့ အနာဂတ်၊ ခိုင်မာတဲ့ အမှတ်တံဆိပ်တွေ တည်ဆောက်ဖို့ Better Version ရှိပါတယ်။

#သင်ထင်ထားတာထက်ပိုပါတယ်။ #တိုးတက်မှုတစ်ခုနေ့စဥ်ပြုပါ။ #MakeYourProgress