အရောင်းသမားတွေအနေနဲ့ များများရောင်းရချင်တယ်ဆိုရင် ဝယ်သူတွေနဲ့ ပြောဆို ဆက်ဆံတဲ့အခါမှာ သတိထားရှောင်ကြဉ်သင့်တဲ့ အပြုအမူတွေ ရှိပါတယ်။ 

တစ်ခါတစ်လေလည်း သတိမထားမိဘဲ ဖြစ်သွားတတ်တဲ့ အမှားမျိုးတွေ ဖြစ်လို့ အောင်မြင်တဲ့ အရောင်းတွေ ရချင်ရင်တော့ ဒီအချက်တွေကို သတိထားရပါမယ်။ ဘယ်လို အပြုအမူမျိုးတွေ ဖြစ်မလဲ လေ့လာကြည့်ရအောင်။ 

၁) လူတိုင်းကို ရောင်းဖို့ကြိုးစားခြင်း

“Everyone is not your customer” (လူတိုင်းက သင့်ရဲ့ customer တွေ မဟုတ်ပါဘူး) လို့ မားကတ်တင်းဂုရုကြီး Seth Godin ကပြောထားပါတယ်။ လုပ်ငန်းတိုင်းမှာ ပစ်မှတ်ထားတဲ့ ဝယ်သူတွေ၊ ဈေးကွက်တွေ ရှိရပါမယ်။ ဒါကို အရောင်းသမားတွေက နားလည်ထားဖို့လည်း လိုပါတယ်။ ကိုယ့်လုပ်ငန်းရဲ့ တားကဒ်ထားတဲ့ ဝယ်သူက ဘယ်သူလဲ၊ သူတို့ ဆီက အရောင်းရဖို့ ဘယ်လို ကြိုးစားရမလဲ ဆိုတာကို သာအာရုံစိုက်ရမှာ ဖြစ်ပြီး၊ ဈေးလာမေးတဲ့သူတိုင်း၊ နောက်မှပဲ ပြန်ပြောတော့မယ် နော် ဆိုပြီး ငြင်းသွားတဲ့သူတိုင်းကို လိုက်ဖြေရှင်းနေရမှာ မဟုတ်ပါဘူး။ ဒါပေမယ့် targeted customer တွေဆီက ငြင်းပယ်မှုတွေ များလာပြီဆိုရင်တော့ ဘာ့ကြောင့်လဲ ဆိုတာကို သုံးသပ်ဖို့လိုပါပြီ။ 

၂) ဝယ်သူကို အထင်သေးခြင်း 

ဒါကိုလည်းဝယ်သူတော်တော်များများကြုံဖူးကြမှာ ဖြစ်သလို၊ အရောင်းသမားအချို့လည်း ဒီလို အပြုအမူမျိုး လုပ်ဖူးပါလိမ့်မယ်။ ထိရောက်တဲ့မေးခွန်း မေးနည်းတွေနဲ့ ဝယ်သူရဲ့ လိုအပ်ချက်၊ လိုအင် တွေကို မသုံးသပ်တော့ဘဲ ဝယ်သူရဲ့ စကားပြောပုံ၊ ဆိုပုံ၊ ဝတ်ပုံစားပုံကို ကြည့်ပြီး သုံးသပ်ချက်မှားတဲ့အခါ ဝယ်သူကို အထင်အမြင်သေးတဲ့ အပြုအမူမျိုး လုပ်မိတတ်ပါတယ်။ ဒါကိုလဲ အရောင်းသမားတိုင်းသတိထားရှောင် ကြဉ်ရပါမယ်။ 

၃) Follow-up မလုပ်လဲ ဝယ်သူ အသစ်ရဖို့သာလျှင် ကြိုးစားခြင်း

အလားအလာရှိတဲ့ ဝယ်သူ အသစ်တွေ​ ရအောင်ကိုပဲ ဦးစားပေးကြိုးစားပြီးတော့ ကုန်ပစ္စည်းအကြောင်းတွေ စျေးနှုန်းတွေတော့ ပို့လိုက်တယ်၊ တင်ပြလိုက်တယ် ဒါပေမယ့် ဘာမှ သတင်းပြန်မကြားရသေးတဲ့ ဝယ်သူတွေကို ပစ်ထားလိုက်တာမျိုးကိုလည်း ရှောင်ကြဉ်သင့်ပါတယ်။  မှန်ကန်ထိရောက်တဲ့ နည်းလမ်းတွေနဲ့ ပြန်ဆက်သွယ် ခြင်း (follow up) လုပ်ရမှာသည်လည်း အရောင်းသမားတွေ အတွက် အရေးကြီးတဲ့ တာဝန်တစ်ခု ဖြစ်ပါတယ်။ 

ဥပမာ – မ၀ယ်သေးတဲ့ ၀ယ်သူဖောက်သည်ကို ၂ပတ် တစ်ခါလောက် ဖုန်းဆက်ပေးတာမျိုး၊ တစ်လတစ်ခါလောက် ပစ္စည်းလေးတွေ အစမ်းသုံးဖို့ ပို့ပေးတာမျိုးနဲ့ ကောင်းမွန်တဲ့  ဆက်ဆံရေးကို ထိန်းသိမ်းထားသင့်ပါတယ်။ ဒါမှပဲ ၀ယ်သူက သူ၀ယ်ယူဖို့ အဆင်သင့်ဖြစ်တဲ့အချိန်မျိုး မှာသင့်​ကို ၊သင့​ကုန်ပစ္စည်းကို သတိရပြီး ၀ယ်ယူလာမှာဖြစ်ပါတယ်။ 

၄) ကိုယ်ရောင်းတဲ့ ကုန်ပစ္စည်းအကြောင်း၊ ဈေးကွက်အကြောင်း အသေးစိတ် နားလည်ဖို့ မကြိုးစားခြင်း

အရောင်းသမားတွေအနေနဲ့ ရောင်းနေတဲ့ ကုန်ပစ္စည်းအကြောင်း၊ ဈေးကွက် အကြောင်းကို မပြတ် လေ့လာရမှာ ဖြစ်ပါတယ်။ ဒါတွေကို လေ့လာထားတဲ့ အရောင်းသမားသည် ရောင်းတဲ့ ကုန်ပစ္စည်းချင်းတူရင်တောင် အခြားသူတွေထက် ယှဉ်ပြိုင်မှု အားသာချက် ဖြစ်ပြီး ဝယ်သူတွေ သင့်ဆီက ဝယ်ဖို့ ရာခိုင်နှုန်း ပိုများပါလိမ့်မယ်။ 

၅) အားလုံးကို သိဟန်ဆောင်ခြင်း

လူတိုင်းသည် အရာအားလုံးကို မသိနေနိုင်ပါဘူး။ ဒါကို ဝယ်သူတွေလည်း နားလည်လက်ခံပါတယ်။ အရောင်းသမားတွေ အနေနဲ့ ဝယ်သူမေးတဲ့ မေးခွန်းထဲမှာ မသိတာမျိုး၊ အဖြေ မသေချာတာ မျိုး၊ ချက်ချင်းဖြေဖို့ အချက်အလက်မရှိတာမျိုးဆိုရင် “ဟုတ်ကဲ့ ကျွန်တော်/ကျွန်မ ဘယ်အချိန်မှာတော့ အတိအကျ အဖြေပြန်ပို့ပေးပါ့မယ်” မက်ဆေ့ပို့ပေးပါ့မယ်။ ဖုန်းခေါ်ပေးပါ့မယ်။ စသည်ဖြင့် ပြောတာမျိုးသည် မှန်ကန်တဲ့ လုပ်ရပ်ဖြစ်ပါတယ်။ ဝယ်သူမေးခွန်းကို ရှောင်ဖို့ ကြိုးစားတာတွေ၊ မသိဘူးမပြောချင်တဲ့ အတွက် မသေချာတဲ့ အဖြေတွေ ပေးပြီး မေးတာတစ်ခြား ဖြေတာတစ်ခြား လုပ်တာမျိုးတွေက ဝယ်သူတွေရဲ့ အရောင်းသမားအပေါ် ယုံကြည်မှုကို ပျောက်ဆုံးစေပါတယ်။ လူတွေသည် ကိုယ်ယုံတဲ့ သူဆီကပဲ ဝယ်တာ ဖြစ်ပါတယ်။ 

ဒါ့ကြောင့် ဒီလိုအပြုအမူတွေကို သတိထားရှောင်ကြဉ်မယ်ဆိုရင် သင့်ဝယ်သူတွေနဲ့ ဆက်ဆံရေး ပိုကောင်းလာပြီး အောင်မြင်တဲ့ အရောင်းတွေ ဖန်တီးနိုင်မှာပါ။

ရောင်းကောင်းကြပါစေ…. 

ပိုကောင်းတဲ့ အနာဂတ်၊ ခိုင်မာတဲ့ အမှတ်တံဆိပ်တွေ တည်ဆောက်ဖို့ Better Version ရှိပါတယ်။

#သင်ထင်ထားတာထက်ပိုပါတယ်။ #တိုးတက်မှုတစ်ခုနေ့စဥ်ပြုပါ။ #MakeYourProgress